இலங்கையர்களின் ஆஸ்திரேலிய பயணத்தை இன்றும் தடுத்து நிறுத்திய கடற்படையினர்!

ஆஸ்திரேலியா நோக்கி சட்டவிரோதமாக பயணித்த படகு ஒன்றை கிழக்கு கடற்பரப்பில் வைத்து கடற்படையினர் கைப்பற்றியுள்ளனர்.

இந்த நடவடிக்கையின் போது படகில் 54 பேர் இருந்ததாக திருகோணமலை கடற்படை முகாமின் அதிகாரிகள் குழு தெரிவித்துள்ளது.

52 ஆண்கள் மற்றும் இரண்டு பெண்கள் உட்பட சந்தேக நபர்கள் திருகோணமலை துறைமுக பொலிஸாரிடம் ஒப்படைக்கப்பட்டதன் பின்னர் கைது செய்யப்பட்டுள்ளனர்.

கும்புறுப்பிட்டி, வாழைச்சேனை, முல்லைத்தீவு, நிலாவெளி, உப்புவெளி, யாழ்ப்பாணம், திருகோணமலை, பனகமுவ, மட்டக்களப்பு, ஏறாவூர், புத்தளம் மற்றும் குச்சவெளி ஆகிய பிரதேசங்களில் வசிப்பவர்கள் 16 முதல் 52 வயதுக்குட்பட்டவர்கள்.

54 சந்தேக நபர்களில் ஆறு பேர் கடத்தல்காரர்கள் என அடையாளம் காணப்பட்டுள்ளதாக பொலிஸார் தெரிவித்தனர்.

சந்தேகநபர்கள் அனைவரும் நீதிமன்றத்தில் ஆஜர்படுத்தப்பட்டதன் பின்னர் ஜூலை 11 ஆம் திகதி வரை விளக்கமறியலில் வைக்கப்பட்டுள்ளனர்.