விக்டோரியா லிபரல் கட்சி குழுவை வழிநடத்த ஜான் பெசுடோ தேர்ந்தெடுக்கப்பட்டுள்ளார். இன்று காலை நடைபெற்ற லிபரல் கட்சியின் உள்கட்சி வாக்கெடுப்பில் பிராட் பேட்டனை தோற்கடித்து அவர் மாநில எதிர்க்கட்சித் தலைவரானார். கடந்த நவம்பர் மாதம் 26ஆம் திகதி நடைபெற்ற விக்டோரியா மாகாணத் தேர்தலில் லிபரல் கூட்டணி தோல்வியடைந்ததைத் தொடர்ந்து எதிர்க்கட்சித் தலைவர் பதவியை ராஜினாமா செய்வதாக மேத்யூ கை அறிவித்ததையடுத்து அந்தப் பதவி காலியானது. 2014 முதல் 2018 வரை விக்டோரியா நாடாளுமன்ற உறுப்பினராக பணியாற்றிய ஜான் பெசுடோ, இம்முறை ஹாவ்தோர்ன் பகுதியை பிரதிநிதித்துவப்படுத்தி மீண்டும் மாநில நாடாளுமன்றத்திற்கு தேர்ந்தெடுக்கப்பட்டார். எதிர்க்கட்சித் தலைவரான பின்னர், தற்போது மந்தநிலையில் உள்ள லிபரல் கட்சியை வெற்றிப் பாதைக்கு அழைத்துச் செல்வதாக அறிவித்தார்.
