டாஸ்மேனியாவின் நகர்புறம் அல்லாத பகுதிகளில் வசிக்கும் முதியோர்கள் மற்றும் முதியோர் பராமரிப்பு மையங்களில் வசிப்பவர்களுக்கு மருந்துகளை பரிந்துரைக்க மருந்தாளுநர்களுக்கு வாய்ப்பு வழங்கப்பட்டுள்ளது.
அவுஸ்திரேலியாவில் இவ்வாறானதொரு சந்தர்ப்பம் அமுல்படுத்தப்படுவது இதுவே முதல் முறை என்பதுடன் பிராந்திய பகுதிகளில் வாழும் மக்களின் சுகாதார சேவைகளை மேம்படுத்துவதே இதன் முக்கிய நோக்கமாகும்.
இதன் மூலம், நோயாளிகளின் பயணச் செலவும், மருத்துவர்களைப் பார்க்கும் நேரமும் குறைக்கப்படும்.
இதன் மூலம் மருந்தாளுனர்களுக்கு பொது வைத்தியர்களுக்குரிய அதிகாரங்களை வழங்குமாறு நீண்டகாலமாக முன்வைக்கப்பட்ட கோரிக்கைகளுக்கும் தீர்வு கிடைக்கும் என சுகாதார அதிகாரிகள் சுட்டிக்காட்டுகின்றனர்.
இருப்பினும், தீவிரமற்ற நோய்களுக்கு மட்டுமே நுண்ணுயிர் எதிர்ப்பிகளை பரிந்துரைக்க அனுமதிக்கப்படுகிறது.
டாஸ்மேனியா மாநிலத்தின் கிராமப்புறங்களில் மிகக்குறைந்த வசதிகளுடன் வசிக்கும் மக்களுக்கு மருந்தாளுனர்கள் மூலம் மருத்துவச் சேவைகளை வழங்குவதற்கு சுகாதாரச் சங்கங்களும் தங்களது பாராட்டுகளைத் தெரிவித்துள்ளன.
உள்ளூர் மருத்துவர்களுக்கும் மருந்தாளுனர்களுக்கும் இடையே நெருங்கிய உறவைக் கட்டியெழுப்புவதன் மூலம் தரமான சுகாதாரப் பராமரிப்பை இது செயல்படுத்துகிறது.
இருப்பினும், மருத்துவர்களால் பரிந்துரைக்கப்படும் அளவை மாற்றுவதற்கு அல்லது தீவிர நோய்களுடன் தொடர்புடைய மருந்துகளை பரிந்துரைக்க மருந்தாளுநர்களுக்கு வாய்ப்பளிப்பதில் இன்னும் ஒருமித்த கருத்து இல்லை.
