ஜனவரி 1 ஆம் தேதி முதல் கான்பெராவின் நகர்ப்புறத்தில் நடப்பட்ட மரங்களை சேதப்படுத்துபவர்களுக்கு $80,000 அபராதம் விதிக்க ACT மாநில அரசு நடவடிக்கை எடுத்துள்ளது.
மோசமான வானிலை, பணியாளர் பற்றாக்குறை மற்றும் சட்டவிரோத மரம் வெட்டுதல் உள்ளிட்ட காரணங்களால் நகர்ப்புற வன விரிவாக்கம் குறைந்துள்ளதாக கூறப்படுகிறது.
2045 ஆம் ஆண்டுக்குள், மாநிலம் முழுவதும் உள்ள பொது மற்றும் தனியார் நிலங்களில் 30 சதவிகிதம் மரங்களை நடுவதை ACT அரசாங்கம் நோக்கமாகக் கொண்டுள்ளது.
கடந்த ஆண்டில், மாநிலம் முழுவதும் நடவு செய்ய வேண்டிய மரங்களை விட, 5,350 மரங்கள் குறைவாக நடப்பட்டு, எதிர்பார்த்த இலக்கை விட, 30 சதவீதம் குறைவாகவே நடப்பட்டுள்ளது.
நகரில் வாகனங்களை நிறுத்துவதற்காக சட்டவிரோதமாக மரங்கள் வெட்டப்படுவதாலும், வீடுகளுக்கு அருகில் உள்ள மரங்களை திட்டமிட்டு சேதப்படுத்துவதாலும் நகர்ப்புறங்களில் உள்ள காடுகள் அச்சுறுத்தலுக்கு உள்ளாகியுள்ளதாக சுற்றுச்சூழல் ஆர்வலர்கள் தெரிவிக்கின்றனர்.
சட்டவிரோதமான முறையில் மரங்கள் வெட்டப்பட்ட இடங்கள் மற்றும் பகுதிகள் குறித்த சரியான தகவல்கள் இதுவரை வெளியிடப்படவில்லை என பல தரப்பினரும் சுற்றாடல் ஆணைக்குழுவிடம் குற்றச்சாட்டுக்களை முன்வைத்துள்ளனர்.
