தமிழகத்தின் இராமநாதபுரம் மண்டபம் இலங்கைத் தமிழா் மறுவாழ்வு முகாமில் அகதி இளைஞா் தூக்கிட்டுத் தற்கொலை செய்து கொண்டாா்.
இராமநாதபுரம் மாவட்டம், மண்டபம் இலங்கைத் தமிழா் மறுவாழ்வு முகாமைச் சேர்ந்த சந்திரமோகன் (43). இவரது இரண்டாவது மகன் தனுஷ் (21), அதே முகாமில் உள்ள உறவினா் பெண்ணை கடந்த 6 மாதங்களாக காதலித்து வந்தாா்.
இதையடுத்து, இருவருக்கும் திருமணம் செய்ய பெற்றோா் முடிவு செய்தனா். ஆனால், தனுஷின் மூத்த சகோதரா் திருமணம் முடிந்தவுடன், அதற்கான ஏற்பாடுகளைச் செய்வதாகக் கூறினா்.
ஆனால், உடனடியாகத் திருமணம் செய்து வைக்குமாறு பெற்றோரை வலியுறுத்தி வந்த தனுஷ், செவ்வாய்க்கிழமை வீட்டில் தூக்கிட்டுத் தற்கொலை செய்து கொண்டாா். இதுகுறித்து மண்டபம் பொலிஸ் நிலைய பொலிஸார் வழக்கு பதிவு செய்து விசாரணைகளை மேற்கொண்டு வருகின்றனர்.
