அமெரிக்க மற்றும் இந்தியா உள்ளிட்ட நாடுகளில் பயங்கரவாதியாக பிரகடனப்படுத்தப்பட்ட தாவூத் இப்ராஹிம் உடல்நிலை சீர்கெட்டதால் வைத்தியசாலையில் அனுமதிக்கப்பட்டுள்ளார்.
‘இன்டர்போல்’ எனப்படும் சர்வதேச காவல்துறையால் உலகெங்கும் “சிகப்பு அலர்ட்” தேடுதல் அறிவிப்பு விடப்பட்டிருக்கும் தாவூத்தின் தலைக்கு 25 மில்லியன் அமெரிக்க டாலர் பரிசு அறிவிக்கப்பட்டிருக்கும் நிலையில், உடல்நிலை சீர்கெட்டதால், இரு தினங்களுக்கு முன் கராச்சியில் உள்ள ஒரு வைத்தியசாலையில் பலத்த பாதுகாப்புகளுடன் அனுமதிக்கப்பட்டுள்ளதாக தகவல்கள் வெளியாகியுள்ளது. அவர் உடலில் விஷம் செலுத்தப்பட்டதற்கான அறிகுறிகள் உள்ளதாகவும் தெரியவந்துள்ளது.
தாவூத் சிகிச்சை பெரும் தளம் முழுவதும் வேறு எந்த நோயாளியும் சேர்க்க அனுமதிக்கப்படவில்லை என்றும் அவ் வைத்தியசாலை வளாகத்தில் பலத்த பாதுகாப்பு நிலவுவதாகவும் தகவல் வெளியாகியுள்ளது.
பாகிஸ்தான் நாட்டு உளவு அமைப்பான ஐஎஸ்ஐ (ISI) மற்றும் பயங்கரவாத அமைப்பான லஷ்கர்-இ-தாய்பா (Lashkar-e-Taiba) ஆகியவற்றுடன் இணைந்து இந்தியாவில் தாக்குதல்களை நடத்திய தாவூத் 1993 மும்பை தொடர் வெடிகுண்டு சம்பவம், 2008 மும்பை தாக்குதல், புனே 2010 ஜெர்மன் பேக்கரி குண்டு வெடிப்பு உள்ளிட்ட பல குற்றங்களுடன் தொடர்புடையவர் என்பது குறிப்பிடத்தக்கது.
