விழா கோலம் பூண்ட அயோத்தியில் ஸ்ரீராமா் சிலை இன்று பிரதிஷ்டை

உத்தர பிரதேசம் மாநிலம், அயோத்தி ராமஜென்ம பூமியில் பிரம்மாண்டமாக கட்டப்பட்டுள்ள ஸ்ரீராமா் கோயிலில் மூலவா் ஸ்ரீபால ராமா் (ராம் லல்லா) சிலை இன்று திங்கட்கிழமை (ஜன.22) பிராணப் பிரதிஷ்டை செய்யப்பட உள்ளது.

இவ்விழாவில் பிரதமா் நரேந்திர மோடி மற்றும் சிறப்பு அழைப்பாளா்கள் பங்கேற்கவுள்ளனா்.

இதையொட்டி, மலா்களாலும் வண்ண விளக்குகளாலும் அலங்கரிக்கப்பட்டு திருவிழாக்கோலம் பூண்டுள்ள அயோத்தி நகரம், நாடே எதிா்நோக்கும் பெரும் நிகழ்வுக்காக தயாா் நிலையில் உள்ளது.

பிரதமா் மோடி உட்பட நாட்டின் முக்கியப் பிரமுகா்கள் சிலை பிரதிஷ்டையில் பங்கேற்கவுள்ளதால், மத்திய படையினருடன் இணைந்து உத்தர பிரதேச மாநில பொலிஸார் பலத்த பாதுகாப்பு ஏற்பாடுகளை மேற்கொண்டுள்ளனா்.

பிரதிஷ்டையைத் தொடா்ந்து, நாளை செவ்வாய்க்கிழமை முதல் கோயிலில் பொதுமக்கள் தரிசனத்துக்கு அனுமதிக்கப்பட உள்ளனா்.

ராமஜென்மபூமி வழக்கில் இந்திய உயர்நீதிமன்றம் கடந்த 2019-ஆம் ஆண்டு வழங்கிய வரலாற்றுச் சிறப்புமிக்க தீா்ப்பில், அறக்கட்டளை அமைத்து அயோத்தியில் ராமா் கோயில் கட்ட அனுமதி வழங்கப்பட்டது.

இதையடுத்து, ஸ்ரீராமா் கோயில் கட்டுமானப் பணிகளுக்காக ஸ்ரீ ராம ஜென்மபூமி தீா்த்த க்ஷேத்திர அறக்கட்டளை உருவாக்கப்பட்டது.

பிரதமா் நரேந்திர மோடி தலைமையில் கடந்த 2020-ஆம் ஆண்டு, ஆகஸ்ட் 5-ஆம் திகதி நடைபெற்ற பூமி பூஜையைத் தொடா்ந்து கட்டுமானப் பணிகள் தொடங்கி நடைபெற்றன.

நாகரா கட்டடக் கலையில் 2.27 ஏக்கா் பரப்பளவில் 3 அடுக்கில் 5 மண்டபங்களுடன் ஸ்ரீராமா் கோயில் கட்டப்பட்டு வருகிறது. கோயிலின் தரைத்தளப் பணிகள் முழுமையாக நிறைவடைந்துள்ள நிலையில், கருவறையில் மூலவா் ஸ்ரீ பால ராமா் (ராம் லல்லா) சிலை பிரதமா் மோடி முன்னிலையில் திங்கட்கிழமை பிராணப் பிரதிஷ்டை செய்யப்பட உள்ளது. பிரதிஷ்டை நண்பகல் 12.20 மணிக்கு தொடங்கி ஒரு மணியளவில் நிறைவடைய உள்ளது.

தென் தமிழக ஆா்.எஸ்.எஸ். தலைவா் ஆடலரசன் தம்பதி உற்பட 14 தம்பதிகள், சிலை பிரதிஷ்டை சடங்குகளை முன்னின்று நடத்தவுள்ளனா். இவ்விழாவில் பல்வேறு மாநில ஆளுநா்கள், முதல்வா்கள், மத்திய அமைச்சா்கள், இந்து மடாதிபதிகள், துறவிகள், இந்து மதத் தலைவா்கள், தொழிலதிபா்கள், பல்துறை பிரபலங்கள் உற்பட 7,000-க்கும் மேற்பட்ட சிறப்பு அழைப்பாளா்கள் பங்கேற்கின்றனா்.

இவா்கள் அனைவருக்கும் கோயில் அறக்கட்டளை சாா்பில் மகா பிரசாதம் வழங்கப்பட உள்ளது. விழாவுக்கு பின்னா், பங்கேற்பாளா்கள் மத்தியில் பிரதமா் மோடி உரையாற்றவுள்ளாா்.

நாளைமுதல் பொதுமக்கள் தரிசிக்க அனுமதி: பிரதிஷ்டை நிகழ்வைத் தொடா்ந்து, அயோத்தி ஸ்ரீராமா் கோயிலில் செவ்வாய்க்கிழமை (ஜன. 23) முதல் பொதுமக்கள் தரிசனம் செய்ய அனுமதிக்கப்படவுள்ளனா். தொடக்கத்தில், நாளொன்றுக்கு 50,000 வரையிலான பக்தா்கள் தரிசனம் செய்வாா்கள் என்று எதிா்பாா்க்கப்படுகிறது.

‘இஸ்கான்’ உள்ளிட்ட பல்வேறு கோயில் அறக்கட்டளைகள் சாா்பில் பிரம்மாண்ட சமையல் கூடங்கள் அமைக்கப்பட்டு, பக்தா்களுக்கு இலவச உணவு வழங்கப்பட்டு வருகிறது.

பிராணப் பிரதிஷ்டைக்கு முந்தைய சிறப்புச் சடங்குகள், ஸ்ரீராமா் கோயிலில் கடந்த 16-ஆம் திகதி முதல் தொடங்கி கோலாகலமாக நடந்து வந்தன.

கா்நாடகம், மைசூரைச் சோ்ந்த பிரபல சிற்பக் கலைஞா் அருண் யோகிராஜ் செதுக்கிய 51 அங்குல உயர பால ராமா் சிலை கருவறையில் கடந்த வியாழக்கிழமை பிற்பகல் நிறுவப்பட்டது.

நாட்டின் பல்வேறு புண்ணிய தீா்த்தக் கட்டங்களில் இருந்து சேகரிக்கப்பட்ட நீரைக் கொண்டு கோயில் கருவறை தூய்மைப்படுத்தப்பட்டது. கோயில் வளாகம் முழுவதும் மலா்கள், சிறப்பு அலங்கார வடிவமைப்பு, வண்ண விளக்குகளால் அலங்கரிக்கப்பட்டுள்ளது. நகரின் 100 இடங்களில் 10 இலட்சம் விளக்குகள் ஏற்றி கொண்டாடவும் ஏற்பாடு செய்யப்பட்டுள்ளது.

வீடுகள்தோறும் தீபமேற்ற அழைப்பு:

பிராணப் பிரதிஷ்டையில் பங்கேற்க பிரதமா் மோடி, கடந்த 12-ஆம் திகதி முதல் கடும் விரதத்தைப் பின்பற்றி வருகிறாா். கடந்த சில நாட்களில் தமிழகத்தின் ஸ்ரீ ரங்கம் அரங்கநாத சுவாமி, ராமேசுவரம் ராமநாத சுவாமி கோயில்கள், நாசிக் ஸ்ரீகாலாராம் கோயிலில் அவா் வழிபாடு நடத்தினாா்.

பிரதமா் அழைப்பின்பேரில், நாடு முழுவதும் கோயில்களில் தூய்மைப் பணிகள் மேற்கொள்ளப்பட்டு வருகின்றன. பிரதிஷ்டையை வீடுகள் தோறும், ராமஜோதி (தீபம்) ஏற்றி, தீபாவளி போல் கொண்டாடவும் அவா் அழைப்பு விடுத்திருக்கிறாா்.

பிரதிஷ்டை நிகழ்வை நாட்டின் பல்வேறு பகுதிகளில் நேரலை ஒளிபரப்பு செய்ய ஏற்பாடுகள் செய்யப்பட்டுள்ளன. நாடு முழுவதும் உள்ள பிரசித்தி பெற்ற கோயில்களில் சிறப்புப் பூஜைகள் நடத்தப்படவுள்ளன.

கொண்டாட்டத்தின் ஒரு பகுதியாக, பாஜக ஆளும் மாநிலங்கள் மற்றும் ஒடிஸாவில் பொது விடுமுறை அறிவிக்கப்பட்டுள்ளது. மத்திய அரசு அலுவலகங்களுக்கும் பிற்பகல் 2.30 மணி வரை அரை நாள் விடுமுறை அறிவிக்கப்பட்டுள்ளது.

அமெரிக்கா, இத்தாலி, அவுஸ்திரேலியா உள்ளிட்ட வெளிநாடுகளிலும் அங்கு வசிக்கும் இந்துக்கள் சாா்பில் பிரதிஷ்டை கொண்டாட்ட நிகழ்ச்சிகளுக்கு ஏற்பாடுகள் செய்யப்பட்டுள்ளன.

பலத்த பாதுகாப்பு:

நாட்டின் முக்கியப் பிரமுகா்கள் அனைவரும் பிரதிஷ்டை விழாவில் பங்கேற்க இருப்பதால், கோயில் வளாகத்தைச் சுற்றியுள்ள பகுதிகளில் பல அடுக்கு பாதுகாப்பு போடப்பட்டுள்ளது.

முக்கியப் பிரமுகா்கள் எளிதாக வந்து செல்லும் வகையில், நகரின் முக்கியச் சாலைகளில் தடுப்புகள் அமைக்கப்பட்டு, போக்குவரத்து கட்டுப்பாடுகள் விதிக்கப்பட்டுள்ளன.

ரசாயனம், உயிரியல், கதிரியக்க மற்றும் அணுசக்தி தாக்குதல்கள், நீா் தொடா்பான அசம்பாவிதங்கள் மற்றும் நிலநடுக்கம் போன்ற பேரிடா்களைச் சமாளிக்க பயிற்சி பெற்ற பல தேசிய பேரிடா் மீட்புப் படை குழுக்கள் அயோத்தியில் பணியமா்த்தப்பட்டுள்ளன.

அயோத்தியில் கடும் குளிா் நிலவுவதைக் கருத்தில்கொண்டு, நகர மருத்துவமனைகளில் கூடுதல் படுக்கை வசதிகள் ஏற்பாடு செய்யப்பட்டு, மருத்துவ தயாா்நிலை உறுதி செய்யப்பட்டுள்ளது. எய்ம்ஸ் சிறப்பு மருத்துவா்களும் அயோத்தி மருத்துவமனைகளில் பணியில் ஈடுபடுத்தப்பட்டுள்ளனா்.

காணிக்கைப் பொருட்கள்:

ராமா் கோயில் பிரதிஷ்டை விழா சடங்குகளுக்காக கன்னௌஜ் பகுதியில் இருந்து வாசனை திரவியம், அமராவதியில் இருந்து 500 கிலோ வெற்றிலை, போபாலில் இருந்து பூக்கள், டெல்லி ராமா் கோயிலில் சேகரிக்கப்பட்ட தானியங்கள் அயோத்திக்கு அனுப்பப்பட்டுள்ளன.

ஸ்ரீராமா் கோயிலுக்காக சீதையின் பிறப்பிடமான நேபாளத்தில் இருந்து 3,000 பரிசுப் பொருட்கள், இந்தியாவின் பல்வேறு பகுதிகளில் இருந்து 108 அடி நீள ஊதுபத்தி, 2,100 கிலோ எடைகொண்ட மணி, 110 கிலோ விளக்கு, தங்கக் காலணி, 10 கிலோ பூட்டு என சிறப்புவாய்ந்த காணிக்கைப் பொருட்கள் அனுப்பப்பட்டன.