இயக்குநர் சிவா இயக்கத்தில் சூர்யா நடிப்பில் உருவாகி வரும் ‘கங்குவா’ திரைப்படத்தை, ஸ்டுடியோ கிரீன் மற்றும் யுவி கிரியேஷன் நிறுவனம் இணைந்து தயாரிக்கின்றன.
இந்த படத்தில் பாலிவுட் நடிகை திஷா பதானி, யோகி பாபு, கிங்ஸ்லி, கோவை சரளா, ஆனந்த் ராஜ் உள்ளிட்ட பலர் முக்கிய கதாபாத்திரங்களில் நடிக்கின்றனர். இந்த படத்துக்கு தேவி ஸ்ரீ பிரசாத் இசையமைக்கிறார். 3டி முறையில் சரித்திர படமாக உருவாகும் ‘கங்குவா’ திரைப்படம் 10 மொழிகளில் வெளியாக உள்ளது.
‘கங்குவா’ படத்தின் படப்பிடிப்பை நடிகர் சூர்யா சமீபத்தில் நிறைவு செய்தார். இந்த படத்தின் போஸ்ட் புரொடக்சன் பணிகள் முழுவீச்சில் நடந்து வருகின்றன.
இந்நிலையில், இந்த படத்தின் புதிய அறிவிப்பு வெளியாகியுள்ளது. அதன்படி ‘கங்குவா’ படத்தின் டீசர் எப்போது வெளியாகும் என்பது குறித்த தகவலை படக்குழு அறிவித்துள்ளது. அதன்படி இந்த படத்தின் டீசர் நாளை மாலை 4.30 மணிக்கு வெளியாகும் என அறிவிக்கப்பட்டுள்ளது.
