ஐக்கிய அரபு அமீரகத்தில் ஏற்பட்டுள்ள கடும் புயல் காரணமாக துபாய் விமான சேவைகள் கடுமையாக பாதிக்கப்பட்டுள்ளன.
தொடர் மழை காரணமாக வளைகுடா பகுதிகள் கடுமையாக பாதிக்கப்பட்டுள்ளதுடன், அப்பகுதி முழுவதும் திடீர் வெள்ளப்பெருக்கு ஏற்பட்டுள்ளது.
இதன் காரணமாக, உலகின் பரபரப்பான சர்வதேச விமான நிலையமாக கருதப்படும் துபாய்க்கு வரும் பல விமானங்கள் வேறு விமான நிலையங்களுக்கு திருப்பி விடப்பட்டன.
ஓமானில் வெள்ளம் காரணமாக 18 பேர் உயிரிழந்துள்ளதாக கூறப்படுகிறது.
ஐக்கிய அரபு அமீரகத்தின் பல பகுதிகளில் பெய்த மழை, ஏறக்குறைய ஓராண்டில் பெய்த சராசரி மழைக்கு சமம் என வானிலை ஆய்வு மையம் தெரிவித்துள்ளது.
செவ்வாய்க்கிழமை காலை, ஐக்கிய அரபு எமிரேட்ஸின் தேசிய வானிலை மையம் அபுதாபி, துபாய் மற்றும் ஷார்ஜா உள்ளிட்ட பல பகுதிகளுக்கு வானிலை எச்சரிக்கையை வெளியிட்டது.
காணாமல் போன இருவரை மீட்புக் குழுக்கள் இன்னும் தேடி வருவதாக அவசரகால மேலாண்மைக்கான தேசியக் குழு தெரிவித்துள்ளது.
75 ஆண்டுகளுக்குப் பிறகு ஐக்கிய அரபு எமிரேட்ஸில் பதிவான அதிகபட்ச மழைப்பொழிவு இதுவாகும், மேலும் உலகின் பரபரப்பான விமான நிலையங்களில் ஒன்றான துபாய் சர்வதேச விமான நிலையத்திலும் வெள்ளம் எப்படி ஏற்பட்டது என்று சர்வதேச ஊடகங்கள் செய்தி வெளியிட்டுள்ளன.
இதற்கிடையில், எமிரேட்ஸ் மற்றும் ஃப்ளை துபாய் உள்ளிட்ட பல விமான நிறுவனங்கள் துபாய்க்கான தங்கள் சேவைகளை தற்காலிகமாக நிறுத்தியுள்ளதாக வெளிநாட்டு ஊடகங்கள் செய்தி வெளியிட்டுள்ளன.
இந்த மழையினால், துபாய் உட்பட அமீரகத்தின் ஏழு பகுதிகளிலும் வெள்ளப்பெருக்கு ஏற்பட்டுள்ளதாகவும், உலகப் புகழ்பெற்ற துபாய் ஷாப்பிங் மால், எமிரேட்ஸ் ஷாப்பிங் மால், சில அடிகள் வெள்ளத்தில் மூழ்கியுள்ளதாகவும் ஊடகங்கள் செய்தி வெளியிட்டுள்ளன.
