ஐ.பி.எல். 2024 கிரிக்கெட் தொடரின் நேற்றைய போட்டியில் கொல்கத்தா நைட் ரைடர்ஸ் மற்றும் டெல்லி கேப்பிட்டல்ஸ் அணிகள் மோதின. கொல்கத்தாவில் உள்ள ஈடன் கார்டன்ஸ் மைதானத்தில் இடம்பெற்ற இந்த போட்டியில் நாணயசுழற்சியில் வென்ற டெல்லி அணி முதலில் துடுப்பெடுத்தாட களமிறங்கியது.
அதன்படி டெல்லி அணிக்கு ஆரம்ப வீரர்களான பிரித்வி ஷா மற்றும் ஜேக் ஃபிரேசர் மெக்கர்க் முறையே 13 மற்றும் 12 ஓட்டங்களில் ஆட்டமிழந்தனர். அடுத்து வந்த அபிஷேக் பொரெல் 18 ஓட்டங்களில் ஆட்டமிழக்க, ஷாய் ஹோப் 6 ஓட்டங்களில் ஆட்டமிழந்தார்.
அணித் தலைவர் ரிஷப் பண்ட் 20 பந்துகளில் 27 ஓட்டங்களை சேர்த்த நிலையில் ஆட்டமிழந்தார். இவருடன் ஆடிய அக்சர் பட்டேல் 15 ஓட்டங்களில் ஆட்டமிழந்தார். கடைசியில் நிதானமாக விளையாடிய குல்தீப் யாதவ் 34 ஓட்டங்களை குவித்தார். போட்டி முடிவில் டெல்லி அணி 9 விக்கெட்டுகளை இழந்து 153 ஓட்டங்களை சேர்த்தது.
154 ஓட்டங்கள் என்ற வெற்றி இலக்கை நோக்கி துடுப்பெடுத்தாட களமிறங்கிய கொல்கத்தா அணிக்கு பில் சால்ட் மற்றும் சுனில் நரைன் சிறப்பான ஆரம்பத்தைக் கொடுத்தனர். இருவரும் முறையே 68 மற்றும் 15 ஓட்டங்களை குவித்தனர். அடுத்து வந்த ரிங்கு சிங் 11 ஓட்டங்களில் ஆட்டமிழந்தார்.
இவரை தொடர்ந்து களமிறங்கிய ஸ்ரேயஸ் அய்யர் மற்றும் வெங்கடேஷ் அய்யர் சிறப்பாக ஆடினர். இருவரும் முறையே 33 மற்றும் 26 ஓட்டங்களை குவித்தனர். இதன் காரணமாக கொல்கத்தா அணி 16.3 ஓவர்களில் மூன்று விக்கெட்டுகளை இழந்து 157 ஓட்டங்களை குவித்து 7 விக்கெட்டுகள் வித்தியாசத்தில் வெற்றி பெற்றது.
டெல்லி சார்பில் அக்சர் பட்டேல் இரண்டு விக்கெட்டுகளையும், வில்லியம்ஸ் ஒரு விக்கெட் வீழ்த்தினர்.
நன்றி தமிழன்
