அவுஸ்திரேலியாவின் புதிய கல்வி மற்றும் குடியேற்றக் கொள்கைகள் காரணமாக சர்வதேச மாணவர்களுக்கு விதிக்கப்பட்டுள்ள கட்டுப்பாடுகளுக்கு கல்வி அமைச்சர் ஜேசன் கிளேர் பதிலளித்துள்ளார்.
அவுஸ்திரேலியாவில் கல்வி முறையின் ஒருமைப்பாட்டை வளர்க்கும் நோக்கில் புதிய கல்வி சீர்திருத்தங்களை அறிமுகப்படுத்தியதாக கல்வி அமைச்சர் வலியுறுத்தினார்.
நாடு முழுவதிலும் உள்ள அனைத்து பல்கலைக்கழகங்களிலும் புதிய சர்வதேச மாணவர் வரம்புகள் குறித்து ஆர்வம் இருப்பதாகவும், கோவிட் தொற்றுநோய்க்கு பின்னர் சர்வதேச மாணவர்கள் வேகமாக அதிகரித்துள்ளதாகவும் சில பல்கலைக்கழகங்கள் அமைச்சரிடம் நெறிமுறையை உருவாக்குமாறு கோரியதாகவும் அமைச்சர் கூறினார்.
சர்வதேச மாணவர்களை சேர்த்துக் கொள்வதில் இருந்து பல்கலைக்கழகங்களை மத்திய அரசு கட்டுப்படுத்தி வருவதாகவும், புதிய கல்விச் சேவை திருத்தச் சட்டம் கொண்டு வருவதாகவும் பல தரப்பினர் குற்றம் சாட்டி வருகின்றனர்.
ஐக்கிய இராச்சியம் மற்றும் கனடா ஆகிய நாடுகளும் இதேபோன்ற பிரச்சினையை எதிர்கொண்டுள்ளதாகவும், அந்த நாடுகளும் சர்வதேச மாணவர்களுக்கு சில கட்டுப்பாடுகளை விதித்துள்ளதாகவும், அவுஸ்திரேலியாவிலும் முறையான முறையை பேணுவது முக்கியம் என்றும் கல்வி அமைச்சர் கூறினார்.
தற்போதைய வீடமைப்பு நெருக்கடியும் இந்த கட்டுப்பாடுகளை பாதிப்பதாக தெரிவித்த கல்வி அமைச்சர், தற்போது அவுஸ்திரேலியாவில் சர்வதேச மாணவர்களுக்கு போதிய தங்குமிட வசதிகள் இல்லை எனவும் அவர் சுட்டிக்காட்டினார்.
மேலும், வெளிநாட்டு மாணவர்களின் எண்ணிக்கை குறைவதை விரும்புகிறீர்களா என ஊடகவியலாளர் ஒருவர் எழுப்பிய கேள்விக்கு பதிலளித்த அமைச்சர், காலப்போக்கில் சர்வதேச மாணவர்கள் நிலையான வளர்ச்சியை காண விரும்புவதாக தெரிவித்தார்.
தற்போது அவுஸ்திரேலியாவில் உள்ள பல பல்கலைக்கழகங்கள் சர்வதேச மாணவர்களுக்கு சில வகையான சட்டக் கட்டுப்பாடுகளை கோரியுள்ளதாகவும், வீசா வழங்கும் போது சரியான நோக்கங்களுக்காக இங்கு வரும் மாணவர்கள் தொடர்பில் உள்நாட்டலுவல்கள் அமைச்சு அக்கறை கொண்டுள்ளதாகவும் அமைச்சர் குறிப்பிட்டார்.
