மெல்போர்னில் திருடப்பட்ட கார் மற்றுமொரு காருடன் மோதியதில் ஏற்பட்ட விபத்தில் நபர் ஒருவர் உயிரிழந்துள்ளார்.
விபத்தை ஏற்படுத்திய திருடப்பட்ட காரை எடுத்துச் சென்ற சிறார்கள் தப்பிச் சென்றுள்ளதுடன், 15 வயதுடைய இரண்டு சிறுமிகள் கைது செய்யப்பட்டுள்ளதாக விக்டோரியா பொலிஸார் தெரிவித்தனர்.
நேற்று மாலை 7 மணியளவில் மெல்பேர்ன் பர்வூட் பகுதியில் இரண்டு கார்களும் மோதியதில் இந்த விபத்து இடம்பெற்றுள்ளதாக தெரிவிக்கப்படுகின்றது.
உயிரிழந்தவர் திருடப்பட்ட காருடன் மோதிய மற்றைய காரின் சாரதி என்பதுடன் அவர் யார் என்ற விபரம் இதுவரை வெளியாகவில்லை.
திருடப்பட்டதாகக் கூறப்படும் காரில் இருந்த நான்கு இளைஞர்கள் சம்பவ இடத்திலிருந்து தப்பிச் சென்றதாகவும், சம்பவ இடத்தில் 15 வயதுடைய இரு சிறுமிகள் கைது செய்யப்பட்டதாகவும் விக்டோரியா பொலிஸார் தெரிவித்தனர்.
இரண்டு சிறுமிகளும் போலீஸ் பாதுகாப்புடன் மருத்துவமனையில் அனுமதிக்கப்பட்டுள்ளனர்.
திருடப்பட்ட காரில் வந்தவர்கள் ஆபத்தான முறையில் வாகனம் ஓட்டியதே விபத்துக்கு காரணம் என பொலிசார் நடத்திய முதற்கட்ட விசாரணையில் தெரியவந்துள்ளது.
