அவுஸ்திரேலியாவிற்கு பாலுறவு கொள்வதற்காக வயது குறைந்த சிறுமியை அழைத்து வந்த குற்றச்சாட்டின் பேரில் சிட்னியைச் சேர்ந்த ஒருவர் பொலிஸாரால் கைது செய்யப்பட்டுள்ளார்.
இந்தோனேசியாவில் இருந்து சிட்னிக்கு சிறுமியை அழைத்து வந்ததாகவும், அங்கு பாலியல் தொழிலில் ஈடுபடுத்தப்பட்டதாகவும் சந்தேக நபர் மீது குற்றம் சாட்டப்பட்டுள்ளது.
ஆஸ்திரேலிய ஃபெடரல் காவல்துறை (AFP) மற்றும் இந்தோனேசிய காவல்துறையினரின் கூட்டு விசாரணைக்குப் பிறகு, பாலியல் தொழிலாளிகளாக பணிபுரிந்த 17 வயது சிறுமி உட்பட ஏராளமான பெண்கள் போலீஸ் காவலில் வைக்கப்பட்டுள்ளனர்.
இந்த கடத்தல் தொடர்பில் கைது செய்யப்பட்ட பிரதான சந்தேக நபர், சிட்னி நகருக்கு தொழிலாளர்களை கண்டுபிடித்து அவர்களை பாலியல் தொழிலுக்கு அனுப்பும் ஒரு ஒழுங்கமைக்கப்பட்ட குழுவின் தலைவர் என தெரிவிக்கப்பட்டுள்ளது.
விசா நிபந்தனைகளை மீறி வெளிநாட்டினர் வந்து பாலியல் தொழிலில் ஈடுபடுவதாக கிடைத்த உளவுத்துறையின் அடிப்படையில் 2022 டிசம்பரில் 43 வயதான இந்த நபரிடம் மத்திய போலீசார் விசாரணையை தொடங்கினர்.
அதுமட்டுமின்றி, மனித கடத்தலுக்கு ஆளாகக்கூடிய பல வெளிநாட்டவர்களும் அடையாளம் காணப்பட்டுள்ளதுடன், அவர்களது பயண ஆவணங்கள் மற்றும் அடையாள அட்டைகளும் பொலிஸாரால் கைப்பற்றப்பட்டுள்ளன.
இந்த நாட்டில் தங்கியிருக்கும் விசாவை நீட்டிப்பதற்காக சில பெண்கள் சிட்னியில் உள்ள ஒரு கல்வி நிறுவனம் மூலம் மாணவர் விசாவைப் பெற்றுள்ளதாக மத்திய காவல்துறை தெரிவித்துள்ளது.
