ஆஸ்திரேலியர்களிடையே மிகவும் பிரபலமான இரண்டு சாக்லேட் பொருட்களின் விலையை இரட்டிப்பாக்க முடிவு செய்யப்பட்டுள்ளது.
Cadbury நிறுவனம் தனது இரண்டு சாக்லேட் தயாரிப்புகளான Freddo Frogs மற்றும் Caramello Koalas ஆகியவற்றின் விலைகள் $1 முதல் $2 வரை உயர்த்தப்பட்டுள்ளதாக இன்று அறிவித்துள்ளது.
கோகோ போன்ற மூலப்பொருட்களின் விலையேற்றமே இந்த விலை உயர்வுக்கு காரணம் என சாக்லேட் தயாரிப்பு நிறுவனம் தங்களது அதிகாரப்பூர்வ சமூக வலைத்தள கணக்குகளில் தெரிவித்துள்ளனர்.
இந்த இரண்டு சாக்லேட் தயாரிப்புகளும் பல தலைமுறைகளாக ஆஸ்திரேலியர்களிடையே மிகவும் பிரபலமாக இருப்பதாக Cadbury செய்தித் தொடர்பாளர் தெரிவித்தார்.
ஆனால் உலகளவில் கோகோவின் விலை வரலாறு காணாத அதிகரிப்பு மற்றும் பிற செலவுகள் காரணமாக இரண்டு பிரபலமான சாக்லேட் தயாரிப்புகளின் விலையை இருமடங்காக உயர்த்த வேண்டியிருந்தது என்று நிறுவனம் தெரிவித்துள்ளது.
10 ஆண்டுகளுக்கும் மேலாக Freddo Frogs மற்றும் Caramello Koalas தயாரிப்புகளின் விலையை உயர்த்துவது இதுவே முதல் முறை என்றும் Cadbury தெரிவித்துள்ளது.
பருவநிலை மாற்றம், பயிர் நோய்கள், விவசாயிகளின் ஏழ்மை மற்றும் சீரற்ற விவசாய முறைகள் போன்ற காரணங்களால் சாக்லேட்டின் முக்கிய மூலப்பொருளான கோகோ உற்பத்தி கடும் நெருக்கடியில் உள்ளதாக நிபுணர்கள் பல மாதங்களாக எச்சரித்து வருகின்றனர்.
