“Beyond The Valley” திருவிழாவிற்கு சட்டவிரோத போதைப்பொருள் பாவனையை தடுப்பதற்காக முதன்முறையாக மாத்திரை பரிசோதனை முறை அமுல்படுத்தப்படவுள்ளதாக தெரிவிக்கப்பட்டுள்ளது.
இந்த ஆண்டு டிசம்பர் 28 முதல் ஜனவரி 1 வரை Geelong அருகே நடைபெறும் “Beyond The Valley” திருவிழாவில் 35,000 க்கும் மேற்பட்டோர் பங்கேற்பார்கள் என்று எதிர்பார்க்கப்படுகிறது.
இத்திருவிழாவின் மூலம் முதன்முறையாக மாத்திரை பரிசோதனை முறை அறிமுகம் செய்யப்படவுள்ளதாகவும், “Beyond The Valley” உட்பட புதிய வருடத்தில் நடைபெறவுள்ள மேலும் 10 நிகழ்வுகளுக்கு Pill Testing முறை அறிமுகப்படுத்தப்படவுள்ளதாக விக்டோரியா முதல்வர் ஜெசிந்தா ஆலன் தெரிவித்துள்ளார்.
கடந்த ஜனவரி மாதம் மெல்பேர்ணில் நடைபெற்ற Hardmission திருவிழாவில் MDMA என்ற மருந்தை அளவுக்கு அதிகமாக உட்கொண்ட 8 பேர் கோமா நிலைக்குத் தள்ளப்பட்டதையடுத்து, மாத்திரை பரிசோதனை முறையை நிறுவுமாறு நிபுணர்கள் கோரிக்கை விடுத்ததாக மேலும் தெரிவிக்கப்பட்டுள்ளது.
இந்த Pill Testing சேவையின் மூலம், அதிநவீன தொழில்நுட்ப உத்திகளைப் பயன்படுத்தி, உடலுக்கு தீங்கு விளைவிக்கும் மருந்துகள், திரவங்கள், இரசாயனங்கள் மற்றும் மருந்து வகைகள் போன்றவற்றை இரகசியமாக அடையாளம் காண முடியும் எனத் தெரிவிக்கப்படுகிறது.
விக்டோரியா அரசாங்கம் 2025 ஆம் ஆண்டின் மத்தியில் மெல்பேர்ணில் மாத்திரை சோதனைக்கான நிரந்தர இடத்தைத் திறக்கும் என்றும் அறிவித்துள்ளது.
