16 வயதுக்கு உட்பட்டவர்கள் சமூக ஊடகங்களை பயன்படுத்த தடை விதித்ததை அடுத்து ஆஸ்திரேலியாவில் பிரபலமான குடும்பம் ஒன்று நாட்டை விட்டு வெளியேற இருப்பதாக அறிவித்துள்ளது.
ஆஸ்திரேலியாவில் பதின்ம வயதினரை பாதுகாக்கும் வகையில் 16 வயதுக்குட்பட்டவர்களுக்கான சமூக ஊடக பயன்பாட்டை அந்நாட்டு அரசு தடை விதித்துள்ளது. இந்த சமூக ஊடக தடையானது டிசம்பர் மாதம் முதல் அமுலுக்கு வரவுள்ளது.
இந்நிலையில் ஆஸ்திரேலிய சமூக ஊடகங்களில் “Empire Family” என அறியப்படும் பிரபலமான குடும்ப உறுப்பினர்கள், ஆஸ்திரேலியாவின் சமூக ஊடக தடைக்கு பிறகு ஆஸ்ரேலியாவில் இருந்து வெளியேறி பிரித்தானியாவுக்கு இடம்பெயர இருப்பதாக அறிவித்துள்ளது.
Empire Family என சமூக ஊடகத்தில் அறியப்படும் கணக்கில், Beck மற்றும் Bec Lea என்ற தாய்மார்கள் மற்றும் அவர்களுடைய 17 வயது மகன் Prezley மற்றும் 14 வயது மகள் Charlotte ஆகிய நான்கு பேர் உறுப்பினர்களாக உள்ளனர்.
பிரித்தானியாவுக்கு இடம் பெயரும் இவர்களது முடிவு, தங்களது மகள் Charlotte தொடர்ந்து வீடியோக்களை பதிவிட உதவும் என தெரிவித்துள்ளனர்.
மேலும் தாங்கள் சமூக ஊடகங்களை நல்ல முறையில் மட்டுமே பயன்படுத்தி வருவதாகவும் அவர்கள் குறிப்பிட்டுள்ளனர்.
