விக்டோரியா மாகாணம் முழுவதும் காட்டுத்தீயை அணைக்கும் பணியில் தீயணைப்பு வீரர்கள் தொடர்ந்து ஈடுபட்டு வருவதாக விக்டோரியா முதல்வர் ஜெசிந்தா ஆலன் தெரிவித்தார்.
விக்டோரியாவில் இன்று காலை 12 காட்டுத்தீகள் பற்றி எரிந்ததாகவும், ஆனால் காலை 8 மணி நிலவரப்படி அவற்றில் இரண்டிற்கு மட்டுமே அவசர எச்சரிக்கைகள் இருந்ததாகவும் அவர் கூறினார்.
Berringama, Bullioh, Koetong, Lucyvale, Shelley, Tallangatta பள்ளத்தாக்கு மற்றும் அதைச் சுற்றியுள்ள பகுதிகளில் உள்ள மக்கள் வீட்டுக்குள்ளேயே இருக்குமாறு அவசர சேவைகள் அறிவுறுத்தியுள்ளன.
Bungil, Burrowye, Granya மற்றும் அதைச் சுற்றியுள்ள பகுதிகளுக்கு உடனடி வெளியேற்ற எச்சரிக்கையும் விடுக்கப்பட்டுள்ளது.
மேலும், மெல்பேர்ணின் தென்மேற்கே உள்ள Carlisle நதிக்கு அருகே கட்டுப்பாட்டை மீறிய தீ காரணமாக, இரவோடு இரவாக, Irrewillipe-இற்கு மற்றொரு தங்குமிட எச்சரிக்கை விடுக்கப்பட்டது.
Longwood தீ விபத்து நடந்த இடத்தை அவசர சேவைகள் அணுக முடிந்தது. அங்கு யார்க் சாலையில் ஒரு வாகனத்திலிருந்து சுமார் 100 மீட்டர் தொலைவில் அடையாளம் தெரியாத ஒரு மனிதனின் உடலைக் கண்டனர்.
இதுவரை, 300க்கும் மேற்பட்ட கட்டிடங்கள் மற்றும் விவசாய நிலங்கள் உட்பட 350,000 ஹெக்டேர்களுக்கும் அதிகமான நிலங்கள் எரிந்துள்ளன.
சில தீ வாரக்கணக்கில் எரியும் என்று எதிர்பார்க்கப்படுகிறது, எனவே மறு அறிவிப்பு வரும் வரை அந்தப் பகுதிகளுக்குச் செல்வதைத் தவிர்க்குமாறு அதிகாரிகள் பொதுமக்களுக்கு அறிவுறுத்துகின்றனர்.
தீயினால் பாதிக்கப்பட்ட பகுதிகளைப் பார்வையிடச் செல்லும் கொள்ளையர்கள் மற்றும் சுற்றுலாப் பயணிகள் குறித்து எச்சரிக்கையாக இருப்பதாக போலீசார் தெரிவித்தனர்.
மாநிலம் தழுவிய மொத்த தீ விபத்து தடை இன்று நீக்கப்பட்டுள்ளது, ஆனால் வடகிழக்கு மற்றும் வட மத்திய மாவட்டங்களுக்கு மொத்த தீ விபத்து தடைகள் தொடர்ந்து அமலில் இருக்கும்.
