பையில் சிசுவின் சடலத்துடன் பேருந்தில் பயணித்த தந்தை

மத்திய பிரதேசத்தில் இறந்த சிசுவின் சடலத்தை சாதாரண மஞ்சள் பையில் வைத்துக்கொண்டு தந்தையொருவர் பேருந்தில் பயணித்த சம்பவமொன்று இடம்பெற்றுள்ளது.

குறித்த நபரின் மனைவிக்கு தின்தோரி மாவட்டத்தில் அரசாங்க வைத்தியசாலையில், செவ்வாய்க்கிழமை (13) ஆண் குழந்தையொன்று பிறந்துள்ளது. குழந்தை பலவீனமாக இருந்ததால், மற்றுமொரு வைத்தியசாலைக்கு மாற்றப்பட்டுள்ளது.

சிகிச்சை பலனின்றி 15 ஆம் திகதி குழந்தை இறந்து விட்டது. ஆனால் அந்த குழந்தையின் உடலை பெற்றோர் தங்கள் சொந்த ஊருக்கு எடுத்துச்செல்வதற்கு வைத்தியசாலை நிர்வாகம் அமரர் ஊர்தி இல்லையென கூறிவிட்டது.

இதனையடுத்து ,அந்த சிசுவை, தந்தை பேருந்தில் இவ்வாறு எடுத்துச் சென்றுள்ளார் என தெரிவிக்கப்பட்டுள்ளது.

நன்றி தமிழன்