ஐ.பி.எல். கிரிக்கெட் தொடரில் நேற்றைய போட்டியில் டெல்லி கெப்பிட்டல்ஸ் மற்றும் சன்ரைசர்ஸ் ஐதராபாத் அணிகள் மோதின. டெல்லியில் நடைபெற்ற இந்த போட்டியில் நாணயசுழற்சியில் வென்ற டெல்லி அணி முதலில் பந்துவீச முடிவு செய்தது.
அதன்படி ஐதராபாத் அணிக்கு ஆரம்ப வீரர்களாக களமிறங்கிய டிராவிஸ் ஹெட் மற்றும் அபிஷேக் ஷர்மா அதிரடியான ஆரம்பத்தைக் கொடுத்தனர். அபிஷேக் ஷர்மா 46 ஓட்டங்களுக்கும், டிராவிஸ் ஹெட் 89 ஓட்டங்களுக்கும் ஆட்டமிழந்தனர்.
இதைத் தொடர்ந்து ஐதராபாத் அணியின் ஸ்கோர் மெல்ல சரிய துவங்கியது. அடுத்து வந்த மார்க்ரம் மற்றும் கிளாசன் முறையே 1 மற்றும் 15 ஓட்டங்களுடன் ஆட்டமிழந்தனர். பிறகு களமிறங்கிய நிதிஷ் குமார் மற்றும் ஷாபாஸ் அகமது சிறப்பாக ஆடினர்.
போட்டி முடிவில் ஐதராபாத் அணி 7 விக்கெட்டுகளை இழந்து 266 ஓட்டங்களை குவித்தது. டெல்லி சார்பில் குல்தீப் யாதவ் 4 விக்கெட்டுகளை கைப்பற்றினார். அக்சர் பட்டேல், முகேஷ் குமார் தலா ஒரு விக்கெட் வீழ்த்தினர்.
கடின இலக்கை துரத்திய டெல்லி அணிக்கு கடினமான ஆரம்பமே கிடைத்தது. அந்த அணியின் ஆரம்ப வீரர்களான பிரித்வி ஷா 16 ஓட்டங்களிலும், டேவிட் வோர்னர் 1 ஓட்டத்துடனும் ஆட்டமிழந்தனர். அடுத்து வந்த ஜேக் ஃபிரேசர் சிறப்பாக ஆடி 18 பந்துகளில் 65 ஓட்டங்களை குவித்தார். இவருடன் ஆடிய அபிஷேக் பொவெல் 22 பந்துகளில் 42 ஓட்டங்களை குவித்தார்.
ஒரு பக்கம் விக்கெட்டுகள் சரிந்த நிலையிலும், ரிஷப் பந்த் நிதானமா ஆடி 44 ஓட்டங்களை குவித்தார். இவரும் கடைசி ஓவரின் முதல் பந்தில் ஆட்டமிழந்தார். இதனால் டெல்லி அணி 19.1 ஓவர்களில் 199 ஓட்டங்களை குவித்து அனைத்து விக்கெட்டுகளையும் இழந்து 67 ஓட்டங்கள் வித்தியாசத்தில் தோல்வியை தழுவியது.
ஐதராபாத் சார்பில் சிறப்பாக பந்துவீசிய நசராஜன் 4 விக்கெட்டுகளையும், மயன்க் மார்கண்டே மற்றும் நிதிஷ் குமார் தலா 2 விக்கெட்டுகளையும், புவனேஷ்வர் குமார், வாஷிங்டன் சுந்தர் தலா ஒரு விக்கெட் வீழ்த்தினர்.
