Melbourne, Point Cook பகுதியில் உள்ள பாடசாலை ஒன்றில் நேற்றிரவு ஏற்பட்ட சந்தேகத்திற்கிடமான தீ விபத்து தொடர்பில் விக்டோரியா பொலிஸார் விசாரணைகளை ஆரம்பித்துள்ளனர்.
தீயினால் எவருக்கும் காயம் ஏற்படாத போதிலும், பல வகுப்பறைகளுக்கு பாரிய சேதம் ஏற்பட்டுள்ளதாக தெரிவிக்கப்படுகின்றது.
தீ விபத்துக்கான காரணம் இதுவரை வெளியாகவில்லை எனவும், இது சந்தேகத்திற்கிடமான சம்பவம் என விசாரணை நடத்தி வருவதாகவும் பொலிஸார் தெரிவித்தனர்.
இதற்கிடையில், மெல்பேர்னின் டெரிமட் பகுதியில் உள்ள இரசாயன தொழிற்சாலையில் நேற்று ஏற்பட்ட தீயை அணைக்கும் நடவடிக்கைகள் தொடர்ந்தும் இடம்பெற்று வருவதாக விக்டோரியா தீயணைப்பு திணைக்களம் தெரிவித்துள்ளது.
குறித்த பகுதியில் வீதிகள் மூடப்பட்டுள்ளதாலும், பாதுகாப்பு நடவடிக்கைகள் காரணமாகவும் அருகில் உள்ள ஏனைய தொழிற்சாலைகளுக்கு செல்ல வந்த வாகனங்கள் பலவும் வீதியிலேயே நிறுத்தப்பட்டுள்ளதாக தெரிவிக்கப்படுகின்றது.
நேற்று காலை தொழிற்சாலையில் ஏற்பட்ட வெடிவிபத்தால் தீ விபத்து ஏற்பட்டதால் தீயணைப்பு வீரர்கள் 4 மணி நேரம் போராடி அணைத்தனர்.
டெல்ஸ்ட்ரா நிறுவனத்தின் தொடர்பாடல் கோபுரம் ஒன்றும் தீயினால் சேதமடைந்துள்ளமையினால் டெரிமட் பகுதியில் சில தொலைபேசி சேவைகள் தடைப்படும் எனவும் தெரிவிக்கப்பட்டுள்ளது.
அந்த இடத்தில் இருந்து வெளியேறும் புகையால் நீண்ட கால பாதிப்புகள் ஏதும் இல்லை எனவும், அப்பகுதி மக்கள் தண்ணீரை பயன்படுத்தும் போது கவனமாக இருக்க வேண்டும் எனவும் எச்சரிக்கை விடுக்கப்பட்டுள்ளது.
இந்த எச்சரிக்கைக்கு காரணம், தீயை அணைக்க அதிக அளவு தண்ணீர் பயன்படுத்தப்பட்டதால், ரசாயனங்கள் கலந்த நீர் பொதுவான நீர்வழிப்பாதைகளில் புகுந்ததுதான்.
எவ்வாறாயினும், அந்த நீர் குடிநீராக இல்லாததால், தற்போது பயன்படுத்தப்படும் குடிநீருக்கு ஆபத்து இல்லை என தெரிவிக்கப்படுகிறது.
இதன் பாதிப்பு சரியாக கண்டறியப்படும் வரை அப்பகுதியில் உள்ள நீர்நிலைகளை அணுக வேண்டாம் என பொதுமக்கள் அறிவுறுத்தப்பட்டுள்ளனர்.
