ஐபிஎல் கிரிக்கெட் தொடரின் 6வது லீக் போட்டி சேப்பாக்கத்தில் நேற்றிரவு நடைபெற்றது.
இதில் சென்னை சூப்பர் கிங்ஸ் மற்றும் லக்னோ சூப்பர் ஜெயன்ட்ஸ் அணிகள் மோதின.
அந்த வகையில், முதலில் துடுப்பெடுத்தாட களமிறங்கிய சென்னை சூப்பர் கிங்ஸ் அணி நிர்ணயிக்கப்பட்ட 20 ஓவரில் 7 விக்கெட்டுக்கு 217 ஓட்டங்கள் எடுத்தது.
அந்த அணியின் ருதுராஜ் கெயிக்வாட் அரை சதமடித்து 57 ஓட்டங்கள் எடுத்து அவுட்டானார். டேவன் கான்வே 29 பந்தில் 47 ஓட்டங்கள் குவித்தார். ஷிவம் டுபே, ராயுடு ஆகியோர் 27 ஓட்டங்கள் எடுத்தனர்.
லக்னோ சூப்பர் ஜெயன்ட்ஸ் சார்பில் மார்க் வுட், ரவி பிஷ்னோய் தலா 3 விக்கெட் எடுத்தனர்.
இதையடுத்து, 218 ஓட்டங்கள் எடுத்தால் வெற்றி என்ற இலக்குடன் லக்னோ சூப்பர் ஜெயன்ட்ஸ் அணி களமிறங்கியது.
தொடக்க ஆட்டக்காரர் கைல் மேயர்ஸ் அதிரடியில் மிரட்டினார். அவர் 22 பந்தில் 2 சிச்கர், 8 பவுண்டரி உட்பட 53 ஓட்டங்கள் குவித்து ஆட்டமிழந்தார். முதல் விக்கெட்டுக்கு கைல் மேயர்ஸ், கே.எல்.ராகுல் ஜோடி 79 ஓட்டங்கள் சேர்த்தது.
அடுத்து வந்த வீரர்கள் நிலைத்து நிற்கவில்லை. பூரன் 32 ஓட்டங்கள், ஆயுஷ் பதோனி 23 ஓட்டங்கள், ஸ்டோய்னிஸ் 21 ஓட்டங்கள், கே.எல்.ராகுல் 20 ஓட்டங்கள் எடுத்தனர்.
இறுதியில், லக்னோ சூப்பர் ஜெயன்ட்ஸ் 205 ஓட்டங்கள் மட்டுமே எடுத்தது. இதன்மூலம் 12 ஓட்டங்கள் வித்தியாசத்தில் சென்னை சூப்பர் கிங்ஸ் அணி நடப்புத் தொடரில் முதல் வெற்றியைப் பதிவு செய்தது. சென்னை அணி சார்பில் மொயீன் அலி 4 விக்கெட் வீழ்த்தி அசத்தினார்.
நன்றி தமிழன்
