அமெரிக்கா சிகாகோவில் இருந்து தென்மேற்கே 65 கிலோமீற்றர் தூரத்தில் உள்ள பகுதியில் கத்திக் குத்து சம்பவம் ஒன்று இடம்பெற்றுள்ளது.
இந்த சம்பவத்தில் 32 வயதுடைய முஸ்லிம் பெண் ஒருவர் படுகாயமடைந்துள்ளார். அத்துடன் குறித்த பெண்ணின் 6 வயது மகன் உயிரிழந்துள்ளார்.
நேற்று முன்தினம் இவர்கள் இருவரும் வீட்டில் இருந்தனர். அப்போது 71 வயது முதியவர் ஒருவர் வீட்டுக்குள் கத்தியுடன் நுழைந்துள்ளார்.
திடீரென அவர் அந்த பெண்ணையும், அவரது மகனையும் வெறித்தனமாக கத்தியால் தாக்கியுள்ளார். 6 வயது சிறுவனை அவர் தொடர்ந்து கத்தியால் குத்திக்கொண்டே இருந்தார். இதில் அவனது உடலில் 26 இடங்களில் கத்திக்குத்து காயம் ஏற்பட்டுள்ளது.
இதைகண்ட அந்த பெண் தனது மகனை காக்க முதியவருடன் போராடினார். அவரையும் முதியவர் கத்தியால் குத்தினார்.அவரிடம் இருந்து தப்பிக்க அந்த பெண் வீட்டு குளியல் அறைக்குள் ஓடினார்.
ஆனாலும் அந்த முதியவர் அவரை விடவில்லை. கத்தியால் தாக்கி விட்டு அங்கிருந்து தப்பியோடி விட்டார். இதில் படுகாயத்துடன் உயிருக்கு போராடிய அவர் தொலைபேசி மூலம் பொலிஸாருக்கு தகவல் வழங்கியதை தொடர்ந்து பொலிஸார் சம்பவ இடத்திற்கு சென்றுள்ளனர்.
கத்திக் குத்திற்கு இலக்கான இருவரையும் மீட்டு பொலிஸார் வைத்தியசாலையில் அனுமதித்த நிலையில், சிறுவன் உயிரிழந்தார்.
சிறுவனின் தாய்க்கு தீவிர சிகிச்சை வழங்கப்பட்டு வருவதாக தெரிவிக்கப்பட்டுள்ளது.
இது தொடர்பான மேலதிக விசாரணைகளை பொலிஸார் மேற்கொண்டு வருகின்றனர்.
நன்றி தமிழன்
