17 வது ஐ.பி.எல். தொடரில் நேற்று 2 லீக் போட்டிகள் நடைபெறுகின்றன. அதன்படி முதலாவது போட்டியில் டெல்லி – மும்பை அணிகள் மோதுகின்றன. இந்த போட்டியில் நாணயசுழற்சியில் வென்ற மும்பை அணியின் தலைவர் பாண்ட்யா பந்துவீச்சை தேர்வு செய்தார்.
இதையடுத்து, முதலில் துடுப்பெடுத்தாட களமிறங்கிய டெல்லி அணிக்கு தொடக்க வீரர்களாக ஜேக் பிரேசர் மெக்கர்க் – அபிஷேக் போரல் ஆகியோர் களமிறங்கினர்.
இதில் தொடக்கம் முதல் ஜேக் பிரேசர் அதிரடியாக விளையாடி ஓட்டங்களைக் குவித்தார். மும்பை அணியின் பந்துவீச்சை பவுண்டரி , சிக்சருக்கு பறக்க விட்டார் வெறும் 15 பந்துகளில் அவர் அரைசதம் விளாசி அசத்தினார். அரைசதம் கடந்த பிறகும் அதிரடியை விடாமல் மும்பை அணியின் பந்துவீச்சை ஜேக் பிரேசர் துவம்சம் செய்தார்.
தொடர்ந்து ஆடிய அவர் 27 பந்துகளில் 84 ஓட்டங்கள் (11 பவுண்டரி, 6 சிக்சர்) எடுத்து ஆட்டமிழந்தார். மறுபுறம் நிலைத்து ஆடிய அபிஷேக் போரல் 36 ஓட்டங்களுக்கு ஆட்டமிழந்தார். தொடர்ந்து வந்த ஷாய் ஹோப் சிறப்பாக ஆடி 17 பந்துகளில் 41 ஓட்டங்களை எடுத்து ஆட்டமிழந்தார்.
பின்னர் ரிஷப் பண்ட் , டிரிஸ்டன் ஸ்டப்ஸ் இருவரும் இணைந்து அதிரடி காட்டினர். இறுதியில் 20 ஓவர்கள் முடிவில் டெல்லி அணி 4 விக்கெட் இழப்பிற்கு 257 ஓட்டங்கள் குவித்தது. ஸ்டப்ஸ் 48 ஓட்டங்களும் , பண்ட் 29 ஓட்டங்களும், எடுத்தனர்.
தொடர்ந்து 258 ஓட்டங்கள் என்ற இமாலய இலக்குடன் மும்பை அணி களமிறங்கியது.
அதன்படி 20 ஓவர்கள் நிறைவில் 9 விக்கெட்டுகளை இழந்து 247 ஓட்டங்களை மாத்திரம் பெற்றுத் தோல்வியுற்றது.
